سیالکوٹ:ڈپٹی کمشنر محمد ذوالقرنین لنگڑیال کا افغان کیمپ کا دورہ ، سہولیات اور حفاظتی امور کا جائزہ لیا

 

سیالکوٹ (ملک حسن رزاق سے )ڈپٹی کمشنر سیالکوٹ محمد ذوالقرنین لنگڑیال نے کہا کہ پاکستان کے دیگر اضلاع کی طرح ضلع سیالکوٹ میں غیر قانونی طور پر مقیم افغان سٹیزن کارڈ ہولڈرز افغان شہریوں کی رضاکارانہ طور پر اپنے ملک واپسی کی ڈیڈ لائن کے ختم ہونے کے بعد ان کی واپسی کا عمل یکم اپریل سے شروع ہوچکا ہے اور اب تک 1 ہزار 701 افغاں شہریوں کو قائم کیمپ میں لایا گیا اور ان کو ان کی ملک روانہ کیا جاچکا ہے۔ یہ بات انہوں نے پسرور روڈ سپورٹس کمپلیکس میں قائم افغان کیمپ کے دورہ کے موقع پر کیمپ میں سہولیات، حفاظتی و انتظامی امور کا جائزہ لینے کے دوران بتائی۔ ڈپٹی کمشنر نے بتایا ک وزارت داخلہ کی جانب سے جاری کیے گئے حکم نامے میں افغان سٹیزن شپ کارڈ ( اے سی سی ) رکھنے والے 464 افغان شہری رضاکارانہ طور پر واپس جاچکے ہیں اور 658 افغان شہریوں کو ڈیڈ لائن گذرنے پر کارروائیوں کے بعد بھجوایا گیا جبکہ 579 افغان شہری اس وقت کیمپ میں موجود ہیں جن کو ضروری قانونی کارروائی کے بعد ان کے اپنے وطن روانہ کردیا جائے گا۔ انہوں نے کہا کہ کیمپ پر افغان شہریوں کی سہولت کیلئے بہترین رہائشی و کھانے پینے کے انتظامات کئے گئے ہیں۔ انہوں نے بتایا کہ ضلع سیالکوٹ میں اے سی سی ہولڈرز افغان شہریوں کی تعداد 5 ہزار 124 ہے جبکہ ڈیٹا کے مطابق 738 غیر قانونی اور 227 کمپلیکس کیسز سامنے آئے ہیں۔