لاہور (گُمنام صحافی)پنجاب کے مختلف شہروں میں انٹیلی جنس بیسڈ آپریشنز میں نو خطرناک دہشت گردوں کو گرفتار کرلیا گیا،دہشت گردوں کا تعلق مختلف کالعدم تنظیموں سے ہے۔
تفصیلات کے مطابق کاؤنٹر ٹیررازم ڈیپارٹمنٹ (سی ٹی ڈی ) نے پنجاب کے مختلف شہروں میں انٹیلی جنس بیسڈ آپریشن کیا اور آپریشن کے دوران 9 خطرناک دہشت گردوں کو گرفتار کرلیا۔
ترجمان سی ٹی ڈی نے بتایا کہ کارروائی ملتان،راولپنڈی،سرگودھا،بہاولپور،ساہیوال اورگوجرنوالہ میں کی گئی، جس میں دہشت گردوں سے بارودی مواد ،ڈیٹو نیٹر ، گولیاںاور نقدی برآمد کرلیا گیا ہے۔
حکام کا کہنا تھا کہ دہشت گردوں کا تعلق مختلف کالعدم تنظیموں سے ہے ، ان کی شناحت عتیق، رشید ، ریاض، صدیق، شعیب،رحیق،زاہد،کاشف اور مقصود کے ناموں سے ہوئی، دہشت گردوں کے خلاف 9 مقدمات درج کرکے تفتیش جاری ہے۔
سی ٹی ڈی نے مزید بتایا کہ رواں ہفتے284 کومبنگ آپریشنز کے دوران 56 مشتبہ افراد گرفتار کیے، کومبنگ آپریشنز میں 13949 افراد سے پوچھ کچھ کی گئی۔
0 تبصرے